ފަޅޮލާއި ގެރިކިރުން ހާޖަތަށް ދިއުމުގެ ފަސޭކަން "ޔޫވީ" ޓީމަށް

އެންމެފަހުން "އުޖާލާވިދުވަރު" ބްލޮގްގައި ކޭލިޖަމިއްޔާއާއި ގުޅޭގޮތުން ޝާއިޢުކޮށްފައިވާ ލިޔުމުގައި މައިގަނޑު ގޮތެއްގައިވަނީ ރަށުގެ ޒުވާންޖީލު ނިކުމެ ޖަމިއްޔާ ބަލިކަށިވެގެންދާހިނދު ކުރިއަރުވަން މަސައްކަތްކުރާތީ އެބުނާ ހިތްވަރުގަދަ "ޔޫވީ" ޓީމަށް ހަޖަމްނުކުރެވިގެން އުޅޭވާހަކައެވެ. "ޔޫވީ" ޓީމަށް ބިރުންގޮސް އެއްފަހަރާ ދެކަމު ހާޖަތަށްދެވިގެން އުޅޭވާހަކައެވެ. ހާޖަތަށް ދިއުމުގައި ހަރުކަމެއް ހުރެ، ތާށިވެގެން އުޅޭވާހަކައެވެ. ދަންނަވަންތޯއެވެ. ފެއިލްވެފައި ތިބި މީހުން ވަރަށް ރަނގަޅަށް އަޅުގަނޑުމެންނަށް އިގެއެވެ. "ޔޫވީ" ޓީމުގައި ހިމެނިގެން ތިޔަވަނީވެސް ހަމަ ތިޔަބޭފުޅުން މިހާރު ތިޔަ ވިދާޅުވާ ޖަމިއްޔާ ހިންގުމުގައި އިސްކޮށް ހަރަކާތްތެރިވެފައިވާ މީހުންނެވެ. ފެއިލްވެފައި ތިބީ ޖަމިއްޔާ ހިންގުމަށް މިހާރު އިސްނަގައިގެން އުޅޭ ޒުވާން ޖީލެއް ނޫނެވެ. ތިޔައޮތީ ވަރަށްބޮޑަށް އޮޅިވަޑައިގެންފައެވެ. ޖަމިއްޔާގެ ކިތާބުތައް ހިރަފުސްފޮޅާ ރަނގަޅަށް މުޠާލިއާކޮށްލާށެވެ. ފެއިލްވެފައި ތިބިބަޔަކީ ކޮންބައެއްކަން ވަރަށް ސާފުކޮށް އެނގެންހުންނާނެވެ. ލިސްޓްގެ ކުރީސަފުގައި ތިޔަ "ޔޫވީ" ޓީމުގެ މީހުން ހިމެނޭނެއެވެ. ކަންބޮޑުވެ ނުލައްވާށެވެ. ތިޔަބޭފުޅުންގެ ފެއިލްވި ހިންގުންތެރިކަން ޒުވާންޖީލު ބަލައެއްނުގަނެއެވެ. އަދި ދަންނަވަންތޯއެވެ. ކުރިމަގަށްޓަކައި ރާވާ ޕްލޭން ތަކަކީ އެކަންކަމުން ޢިބުރަތްލިބިގަނެ ތައްޔާރުކުރާ ޕްލޭންތަކެވެ. އެހެންކަމުން ދަންނަވާލަން އޮތީ ވަރަށް ކުޑަ ވާހަކައެކެވެ. ފަޅޮލާއި ގެރިކިރުގެ އުދާސްތައް އަދި "ޔޫވީ" ޓީމަށް އުނގަންނައިދޭނެވެ. ކޮންބައެއްތޯއެވެ؟ ޖަމިއްޔާގެ ހިންގުންތެރީންނެވެ. ކެތްކޮށްލައްވާށެވެ. އަދި ތިއުޅެވެނީ މާއަވަސްއަރުވާލައިގެންނެވެ.

ކުރެވުނު ދިރާސާއާއި، ތަޙުޤީޤުކުރެއްވުމަށްޓަކައި "ޔޫވީ" ޓީމުން ތިޔަ ކުރެއްވި ބުރަ މަސައްކަތަށްޓަކައި އައްސަރިބަހާ ސާބަހެވެ. ފަށްފަށުން ޝުކުރެވެ. ރައްޔިތުންނަށްޓަކައި ތެދު ޚަބަރެއް ގެނެސްދިނުމުގެ ނިޔަތް އެކަމުގައި އެކުލެވިގެންވާނަމަ ހާދާހާވާ އުފާކުރަމެވެ. އެހަނަސް ކުރެވުނު ދިރާސާއާއި ކުރެވުނު ތަހުޤީޤުގެ އަލީގައި ތިޔަ ތައްޔާރު ކުރެއްވުނީ ފަޅޮލާއި ގެރިކިރުން ހާޖަތަށް ދިއުމުގެ ފަސޭހަކަމާއި ބެހޭ ރިޕޯޓެއް ދެއްތޮއެވެ. ރަނގަޅެވެ. "ޔޫވީ" ޓީމަށް ބިރުންގޮސް ހާޖަތަށް ދިއުމުގައި ދަތިވެގެން އުޅުން ދަތިކަން ދިރާސާއި ތަހުޤީޤުން ސާފުވެއްޖެތާއެވެ. އުފާކުރުން ހުއްޓެވެ. ފަހެ ދިލަކަންވެސް ފިލާހިނގައްޖެތާއެވެ.

ރައްކާވެތިބިއްޔާ ދަތުރެވެ. ބުނާއަޑު އަހަންތޯއެވެ. ޖަމިއްޔާ ކުރިއެރުވުމަށްޓަކައި ޖަމިއްޔާއާ ހަވާލުވާ ޒުވާންޖީލު ކުޅެމުންދާނީ މުޅީންވެސް ގޭމެވެ. މޮޅެތި ކުޅިވަރެވެ. ރާވަމުންދާނީ އޮއްޓަރުހުރި ޕްލޭންތަކެވެ. ނަތީޖާ އިރާދަކުރެއްވިއްޔާ ވަރަށްވެސް ފޮނިވާނެއެވެ. ޕްލޭނާއި އެއްގޮތަށް ކުޅެމުންދާ ގޭމްތަކާއި ކުޅިވަރުތައް ކުޅެމުންދާނީ ފިސާރިކެރިގެން ހުނަރުވެރިކަމާއެކީއެވެ. "ޔޫވީ" ޓީމުން މަންޒަރު ބަލަންތިބުން އައުލާކަން ބޮޑުވެގެންވެއެވެ. ދަންނަވަންތޯއެވެ. ޒުވާންޖީލު ޖަމިއްޔާއާއި ޙަވާލުވުމަށްފަހު ބޮޑުވަމުންދާނީ ޚަޒާންދާރުގެ ވޮލެޓެއްނޫނެވެ. ފުޅާވެގެންދާނީ ޖަމިއްޔާގެ މާލިއްޔަތެވެ. ބޮޑުވާނީ ޖަމިއްޔާގެ ތިޖޫރިއެވެ. ފައިދާވަމުންދާނީ ކަނޑީތީމުގެ ރައްޔިތުންނަށާއި ތިޔަ "ޔޫވީ" ޓީމަށެވެ.

މަޢުލޫމާތަށްޓަކައި އިތުރަށް ދަންނަވާލަމެވެ. ނަމުން ބްލޮގް ހަދައިގެން ރައްޔިތުންނަށް އޮޅުވާލުމަށް "ޔޫވީ" ޓީމުން ތިޔަ ކުރައްވާ މަސައްކަތަކީ ބޭކާރު މަސައްކަތެކެވެ. ކަނޑީތީމުގެ ޒުވާންޖީލު ކީއްތޯއެވެ. ކަނޑީތީމުގެ މުޅި ރައްޔިތުންންވެސް ތިބީ ޒަމާނަށް ލޯހުޅުވި ނުހަނު ސާބިތުކަންމަތީގައެވެ. ނުގުޑާފަދަ ވަރުގަދަ ޢަޒުމެއްގައެވެ. އެހެނީ ތިޔަފަދަ ލިޔުމަކުން އަޅުގަނޑުމެންނަށްކުރާނެ އަސަރަކީ ގައިން އިސްތަށްޓެއް މަދުވީމާ ކުރާނެ އަސަރެވެ. ކަހަރުވަކެކޭވެސް ހީނުވާނެއެވެ.

ޚިޔާލުފާޅުކުރުމުގެ މިނިވަންކަމާއި ޒާތީ މަސްލަޙަތު

ދިވެހިރާއްޖޭގެ ޖުމުޙޫރިއްޔާގެ ޤާނޫނު އަސާސީ ވަރަށް ސާފެވެ. ޤާނޫނު އަސާސީގެ 24 ވަނަ މާއްދާގައި ޒާތީ ދިރިއުޅުން ބަޔާންކޮށްދީފައިވަނީ "ކޮންމެ މީހެއްގެ ޒާތީ އަދި ޢާއިލީ ދިރިއުޅުމާއި، ގޮވަތި ގެދޮރާއި، އަނެކުންނާއި ކުރާ ޒާތީ މުއާޞަލާތުތަކަކީ ޙުރުމަތްތެރިވެގެންވާ ކަންކަމާއި ތަންތަނެވެ. ހަމަ ކޮންމެމީހަކުމެ، އަނެކުންގެ މިބުނެވުނު ޙައްޤުތަކަށް ޙުރުމަތްތެރިކޮށް ހިތަންވާނެއެވެ." މިފަދައިންނެވެ.

ޚިޔާލުފާޅުކުރުމުގެ މިނިވަންކަން ޤާނޫނު އަސާސީގައި ވަރަށް ފުރިހަމައަށް ލިބިދީފައިވެއެވެ. ޤާނޫނު އަސާސީގެ 27 ވަނަ މާއްދާގައިވަނީ "މިނިވަންކަމާއެކު ފިކުރުކުރުމާއި، އިސްލާމްދީނުގެ އަސްލަކާއި ޚިލާފުނުވާ ގޮތެއްގެމަތީން އެމީހެއްގެ ބުއްދިއަށް ފެންނަގޮތްތަކާއި ޚިޔާލުތައް ދުލާއި ޤަލަމުން އަދި މިނޫންވެސް ގޮތްގޮތަށް ފާޅުކުރުމުގެ މިނިވަންކަން ކޮންމެ މީހަކަށްމެ ލިބިގެންވެއެވެ." މިހެންނެވެ. ހަމަ އެހެންމެ ނޫސްވެރިކަމުގެ މިނިވަންކަމަކީވެސް ޤާނޫނު އަސީސީ ކަށަވަރުކޮށްދޭ މިނިވަންކަމެކެވެ. 28 ވަނަ މާއްދާގައި އެކަން ބަޔާންކޮށްފައިވަނީ "ނޫސްވެރިކަން ކުރުމާއި، މުއާޞަލާތީ ވަޞީލަތްތައް ބޭނުން ކުރުމުގެ މިނިވަންކަން ކޮންމެ މީހަކަށްމެ ލިބިގެންވެއެވެ. މީގެ ތެރޭގައި ޚަބަރާއި، މަޢުލޫމާތާއި، ފެންނަގޮތްތަކާއި ޚިޔާލުތައް ފާޅުކުރުމާއި، ޝާއިޢުކުރުމާއި، ފެތުރުމުގެ މިނިވަންކަން ހިމެނެއެވެ. މިގޮތުން ޝާއިޢުކުރާ ނުވަތަ ފަތުރާ ނުވަތަ ފާޅުކުރާ މަޢުލޫމާތެއްގެ މަސްދަރު ހާމަކުރުމަށް އެއްވެސް މީހަކަށް މަޖުބޫރުކޮށްގެން ނުވާނެއެވެ." މި ޢިބާރާތުންނެވެ.

ޚިޔާލުފާޅުކުރުމުގެ މިނިވަންކަމަކީ ޤާނޫނު އަސާސީ އަޅުގަނޑުމެންނަށް ކަށަވަރުކޮށްދޭ މިނިވަންކަމެކެވެ. އެހެންނަމަވެސް ޤާނޫނު އަސާސީން ލިބިދޭ މިނިވަންކަމެއް ނުވަތަ ޙައްޤެއް ނަހަމަގޮތުގައި ބޭނުންކުރުމަކީ މުޖުތަމަޢުގެ ތެރޭގައި ފަސާދައާއި ނުރައްކަލަށް ހުޅުވޭ ދޮރަކަށްވުން ވަރަށް ގާތެވެ. ހާމަކަންބޮޑު ގޮތެއްގައި ފެންނަން ހުރި މިޡާލުތައް ނުހަނު ގިނައެވެ. މި ކުޑަ ކުޑަ ކަނޑިތީމުގައިވެސް މިފަދަ މަންޒަރުތައް ފެންނަމުން އެބަދެއެވެ. ހިތާމަހުރިކަމެކެވެ. އެހެންނޫންތޯއެވެ.

އަޅުގަނޑުމެންގެ ތެރޭގައި ޒަމާނަށްއައި ކުރިއެރުމާއި ތަރައްޤީގެ ބޭނުން ހިފާމީހުން ވަރަށްގިނައެވެ. އޮންލައިން ވެބްސައިޓްތަކާއި ބްލޮގް ލިޔާމީހުން ޢަދަދު ގުނާލުމަށް ވަރަށް ދައްޗެވެ. އެގޮތުން ކަނޑިތީމުގެ ރައްޔިތުންގެ ތެރޭގައިވެސް މިފަދަ ވަޞީލަތްތައް ބޭނުންކޮށްގެން މަޢުލޫމާތާއި، ޚިޔާލާއި، ޚަބަރުފެތުރުމަށް ތަފާތު ނަންނަމުގައި ވެބްސްއިޓާއި ބްލޮގްތައް ތައްޔާރުކޮށް ހިންގަމުންގެންދެއެވެ. ބައެއް ބްލޮގަކީ މީހުންނަށް ބަދު ބަސް ބުނެ، އާޑަފުރައްސާރައިގެ ވާރޭ ވެއްސާ ތަންތަންކަމުގައި ހަދާފައިވާ ބްލޮގެވެ. އެކުލެވިގެންވަނީ ތެދު މަޢުލޫމާތާއި ދޮގޮ މަޢުލޫމާތެވެ. ބައެއްކަންކަމުގައި ފަތުރަމުން ދަނީ މުޖުތަމަޢު ފަސާދަވާފަދަ ނުރައްކާތެރި ޚަބަރުތަކެވެ. ފާޅުކުރަމުންދާ ޚިޔާލުތަކާއި ޝާއިޢުކުރަމުންދާ ލިޔުންތަކަކީ އޭގައި އިންތިހާއަށް ޒާތީ މަސްލަޙަތު އިސްކުރެވިފައިވާ އަދި އެކުލެވިގެންވާ ޚިޔާލާއި ލިޔުންތަކެވެ.

ނަހަމަ ގޮތުގައި ފާޅުކުރާ ޚިޔާލަކުން، މުޖުތަމަޢުތެރޭގައި ފަތުރާ ޚަބަރަކުން ނުވަތަ މީހެއްގެ އަބުރަށް ހުތުރުވާގޮތަށް ޝާއިޢުކުރާ ލިޔުމަކުން މުޖުތަމަޢު ފަސާދަވެގެން ދިއުންވަނީ ނުހަނު ގާތުގައެވެ. ކަނޑިތީމާއި ގުޅޭ ޚަބަރާއި މަޢުލޫމާތު ފެތުރުމަށްޓަކައި ތައްޔާރުކޮށްފައިވާ "އުޖާލާވިދުވަރު" ނަމަކަށްކިޔާ ބްލޮގެއްވެއެވެ. ފެންނަފެނުމަށް ބްލޮގް ކިތަންމެހާވެސް ރީތިވެފައި ޗާލެވެ. އެހެނަސް ޝާއިޢުކުރެވިފައިވާ ގިނަ ލިޔުންތަކުގައިވަނީ ދޮގު މަޢުލޫމާތާއި ކޮންމެވެސް ކަމަކާގުޅިގެން ވަކި ފަރާތަކާ ފިލުވާލެވިފައިވާ ހަސަދަ އިންތިހާއަށް އެކުލެވިގެންނެވެ. ރަށުގައި އުފެދިފައިވާ މަދަނީ ޖަމިއްޔާއާއި ގުޅޭގޮތުންވެސް ލިޔެފައިވާ ލިޔުމަކީ އޮއްޓަރެއް އޭގައި އެކުލެވިގެންނުވާ ރައްޔިތުންނަށް އޮޅުންއަރާފަދަ ލިޔުމެކެވެ. އެބައިމީހުން ހިމެނޭކަމެއްގައި އެބައިމީހުންނަށް ނުވިކަމެއް ޒުވާންޖީލު ނިކުމެ ކުރަންއުޅޭތީއަށްވެސް ވެދާނެއެވެ. އެހެންކަމުން އުޖާލާވިދުވަރުގެ "ޔޫވީ" ޓީމަށް ގޮވާލަނީ ޒާތީމަސްލަޙަތު އެއްފަރާތްކޮށް ރައްޔިތުންނަށް ތެދު ޚަބަރާއި މަޢުލޫމާތު ފޯރުކޮށްދޭ ބްލޮގަކަށް އުޖާލާވިދުވަރުހެދުމަށެވެ. ޒިންމާދާރު ލިޔުންތެރީންނަށް ވުމަށެވެ. ޤާނޫނީ ތަރަހައިން ބޭރުގައި، ލިބިފައިވާ މިންވަންކަން ބޭނުން ނުކުރުމަށެވެ. މުޖުތަމަޢު ފަސާދަ ކުރުމަށް މަސައްކަތްނުކުރުމަށެވެ.

މޯލްޑިވްސް އެން.ޖީ.އޯ ފެޑެރޭޝަންގެ 2 ވަނަ ޖެނެރަލް އެސެމްބްލީގައި ކޭލި ޖަމިއްޔާއިން ބައިވެރިވެއްޖެ.

މޯލްޑިވްސް އެން.ޖީ.އޯ ފެޑެރޭޝަން (އެމް.އެން.އެފް) އަކީ 1996 ވަނަ އަހަރު ދިވެހިރާއްޖޭގައި އުފެދިފައިވާ މަދަނީ ޖަމިއްޔާތަށް އެއްކުޑައެއްގެ ދަށަށް ޖާމަކުރުވައި ޤަޢުމުގެ އިޖްތިމާޢީ ތަރައްޤީގެ ޙާލަތު އިތުރަށް ތަރައްޤީކުރުމަށް ބާރުއަޅައި، މަދަނީ ޖަމިއްޔާތައް ދިރިދެމިގެންދާފަދަ ރޫޙަކާއެކު ކުރިއެރުވުމަށް މަގުދައްކައިދީ، އެފަދަ ކަންކަމަށް މަސައްކަތްކޮށް، އުފެދިފައިވާ އެންމެހާ މަދަނީ ޖަމިއްޔާތަކަށް އެހީފޯރުވައިދިނުމުގެ މަޤުޞަދުގައި އުފައްދާފައިވާ ފެޑެރޭޝަނެކެވެ. މިހާތަނަށް މި ފެޑެރޭޝަންގައި ރާއްޖޭގެ އެކި ކަންކޮޅުތަކުން 44 ޖަމިއްޔާއެއް ރަޖިސްޓްރީކޮށްފައިވެއެވެ. އެގޮތުން ކޭލި ޖަމިއްޔާއަކީވެސް ފެޑެރޭޝަންގެ މެންބަރެކެވެ.

މި މަހުގެ 18-20 އަށް ހޮލިޑޭއިންގައި ކުރިއަށް ގެންދިޔަ މި އެސެމްބްލީގައި ކޭލިޖަމިއްޔާއިން ވަނީ ބައިވެރިވެފައެވެ. މި އެސެމްބްލީގެ ހުޅުއްވައިދެއްވަމުން ދައުލަތުގެ ބަންޑާރަނައިބު ވިދާޅުވީ "އަޅުގަނޑުމެންގެ ޤައުމު މިއަދު މިވަނީ ދިވެހިން ދުވަހަކުވެސް ދެކެފައިނުވާފަދަ ނުރައްކާތެރި ޙާލަތެއްގަ" ކަމަށެވެ. މާރާމާރީއާއި މަސްތުވާއެއްޗެހި ބޭނުން ކުރާމީހުން އިތުރުވަމުންދާކަމުގެ ކަންބޮޑުވުން ފާޅުކުރައްވަމުން، އިތުރަށް ވިދާޅުވީ "މިފަދަ ނުރައްކާތެރިކަމަކުން މުޖުތަމަޢު ސަލާމަތްކުރުމުގައި މަދަނީ ޖަމިއްޔާތަކުގެ ދައުރު ވަރަށްވެސް ފުޅާ. ކަންކަންމަތީގައި ކަމެއް ނެތި، ވަޒީފާއެއްނެތިފައި ތިބޭ އެތައް ޒުވާނުންނެއް އެބަތިބި. އެހެންކަމުން މިފަދަ މީހުން މޮބިލައިޒް ކޮށް، މަދަނީ ޖަމިއްޔާތަކުން ހިންގާ ތަފާތު ޙަރާކާތްތަކުގައި މިފަދަ ޒުވާނުން ބައިވެރިކުރެވިދާނެ" ކަމުގައެވެ.

18 ވަނަ ދުވަހު ކުރިއަށް ދިޔަ ފުރަތަމަ ސެޝަންގައި 2009 ވަނަ އަހަރުގެ އަހަރީ ރިޕޯޓާއި އަހަރީ ހިސާބު ފާސްކުރުން އޮތެވެ. އަހަރި ރިޕޯޓްގައި ކުދި މައްސަލަ ހުރުމާއެކު މެމްބަރ ޖަމިއްޔާތަކުން ހުށަހެޅި އިޞްލާޙުތައް އިތުރުކޮށް، ހަތް މެމްބަރުންގެ ކޮމިޓީއަކަށް ފޮނުވުނެވެ. އަދި ފެޑެރޭޝަންގެ ހިންގާ ޤަވާޢިދަށް އިޞްލާޙު ގެނައުމަށްވެސް މެމްބަރ ޖަމިއްޔާތަކުގެ ޚިޔާލު ހޯދުނެވެ. އެހެންނަމަވެސް އެހާކުޑަވަގުތުކޮޅެއްގައި ވިސްނާލުމަށްފަހު ހުށަހަޅާ އިސްލާހަކުން އެފަދަ ހިންގާ ޤަވާޢިދަކަށް އިސްލާޙު ގެނައުމަށް ފާސްކުރުމަކީ ވިސްނާލަންޖެހޭކަމެއްކަމަށް ބައެއް މަންދޫބުން ފާހަގަކުރެއްވިއެވެ. އެހެންކަމުން ޤަވާޢިދަށް މެންބަރު ޖަމިއްޔާތަކުން ގެންނަން ބޭނުންވާ އިޞްލާޙުތައްގެނައުމަށް އަދި ފަހުން އިތުރު ބައްދަލުވުމެއް ބާއްވާނީކަމަށް ގިނަ މަންދޫބުންގެ ތާއީދާއެކު ފެޑެރޭޝަންގެ ރައީސް ނިންމެވިއެވެ. އެއަށްފަހު ކުރިއަށް ގެންދިޔައީ އާދައުރަކަށް ފެޑެރޭޝަންގެ ގަވަރނިންގ ކައުސިލް އިންތިޚާބު ކުރުމެވެ.

ފެޑެރޭޝަންގެ ފާއިތުވި ދައުރުގެ ގަވަރނިންގ ކައުސިލުން އެކަށައަޅާފައިވާ "ސްވޮޓް އެނަލައީސިސް" (SWOT Analysis) ފާސްކުރުމާއި ކުރިއަށް އޮތް ފަސް އަހަރުގެ ދިގުމުއްދަތުގެ "ސްޓްރެޓެޖީކް ޕްލޭން" (Strategic Plan) އެކުލަވާލައި ފާސްކުރުން އޮތެވެ. ސްވޮޓް އެނަލައީސިސްއަކީ ފެޑެރޭޝަންގެ ހުރި ޤާބިލިއްޔަތުކަމާއި ބަލިފައިތަކާއި ލިބިފައި ހުރި ފުރުޞަތުތަކާއި ކުރިމަތިވެފައިވާ ދަތިތަކާއި ހުރަސްތަކުގެ މައްޗަށް ބިނާކޮށް ތައްޔާރުކުރާ ޚުލާޞާ ރިޕޯޓެކެވެ. މީގެ އިތުރުން ފާސްކުރި "ސްޓްރެޓެޖީކް ޕްލޭން"ގެ މައްޗަށް ބިނާކޮށް 2010ވަނަ އަހަރުގެ "އެކްޝަން ޕްލޭން" އެކުލަވާލައި ފާސްކޮށްފައިވެއެވެ.

މި ބައްދަލުވުމުގެ ފަހު މަރުޙަލާގައި ކުރިއަށްގެންގޮސްފައިވަނީ މަދަނީ ޖަމިއްޔާތަކުން މިހާތަނަށް ތަޖުރިބާކޮށްފައި ހުރި ކަންކަމުގެ މައްޗަށް ރިޢާޔަތްކޮށް ޖަމިއްޔާތަކާބެހޭ ޤާނޫނު (1/2003) އަށް އިޞްލާޙު ހުށަހެޅުމެވެ. މިނިސްޓްރީ އޮފް ހޯމް އެފެއާރޒްގެ އެދިލެއްވުމުގެ މަތިން މި ސެޝަންގައި މެންބަރު ޖަމިއްޔާތަކުން ފާހަގަކޮށްފައިވާ ކަންކަން އެމިނިސްޓްރިއަށް ހުށަހަޅާގޮތަށް ވަނީ ނިންމާފައެވެ. އެހެންނަމަވެސް ތަފާތު ސަބަބުތަކާހުރެ ގިނަ މެމްބަރު ޖަމިއްޔާތަކުން މި ބައްދަލުވުމުގައި ބައިވެރިނުވެވުމުގެ ސަބަބުން އަދި އިތުރު ބައްދަލުވުމެއް ބާއްވާ، ދައުލަތުގެ ބަންޑާރަނައިބުގެ ލަފާފުޅާއެކު ކުރިއަށް ގެންދާގޮތަށް ނިންމިއެވެ. މީގެ އިތުރުން ބަންޑާރަ ނައިބު ވަޑައިގެން މިހާރު ހުށަޅާފައިވާ ލާމަރުކަޒީ އުޞޫލުން އަތޮޅުތައް ހިންގުމާބެހޭ ބިލުގެ މަޢުލޫމާތު މަދަނީ ޖަމިއްޔާތަކާއި ޙިއްސާކޮށް މަންދޫބުން ކުރެއްވި ސުވާލުތަކަށް ޖަވާބުދެއްވާފައިވެއެވެ.

ތިން ދުވަހުގެ މުއްދަތަށް ކުރިއަށް ގެންދިޔަ މިބައްދަލުވުން ނިންމުމުގެ ރަސްމިއްޔާތުގައި ބައްދަލުވުމުގައި ބައިވެރިވި 22 ޖަމިއްޔާއަށް މެންބަރުކަމުގެ ލިޔުން ޙަވާލުކުރުން އޮތެވެ. މި ބައްދަލުވުމުގައި ލިބުނު މަޢުލޫމާތާއި ޖަމިއްޔާތަކުގެ ފަރާތުން ހިއްސާކުރެއްވި ކަންކަމަކީ ފެޑެރޭޝަންގެ ކުރިއެރުމަށް ލިބިގެންދިޔަ ވަރަށްބޮޑު ހިތްވަރަކާއި ކުރިއެރުމެއްކަމަށް ފެޑެރޭޝަންގެ މިދައުރުގެ ރައީސާ ފާތިމަތު އާފިޔާ ފާހަގަކުރައްވާފައިވެއެވެ. މި ބައްދަލުވުން ކުރިއަށް ގެންގޮސްފައިވަނީ "ކެނެޑާ ފަންޑް" އާއި "ހޮލީޑޭއިން" ގެ އެހީއާކުކަމަށް ފެޑެރޭޝަން އިން ހާމަކުރައްވައެވެ.